Kryetari i Komunitetit Mysliman të Shqipërisë, H. Bujar Spahiu, priti sot në selinë e institucionit një delegacion me përfaqësues të lartë të Bashkësisë Islame të Kosovës, të kryesuar nga Myftiu, Naim ef. Tërnava.

Bashkëbisedimi ndërmjet tyre u përqendrua në marrëdhënien dhe bashkëpunimet e deritanishme ndërmjet dy institucioneve. Më tej ata u fokusuan në aktualitetin e besimtarëve myslimanë brenda dhe jashtë kufijve të trojeve Shqiptare. Pjesë e diskutimeve të tyre u bënë edhe zhvillimet sociale, kulturore dhe humanitare të të dy vendeve.

Më tej, Myftiu Tërnava, e uroi Kryetarin Spahiu për zgjedhjen e tij në krye të Komunitetit Mysliman Shqiptar, dhe i shprehu atij gatishmërinë e institucionit që ai përfaqëson për ta vazhduar më tej frymën e mirë të bashkëpunimit në shërbim të fesë Islame.

Nga ana e tij, Kryetari i KMSH-së, z. Spahiu, pasi i falënderoi të pranishmit për vizitën dhe urimet, i siguroi ata se nën drejtimin e tij, Komuniteti Mysliman i Shqipërisë do të jetë gjithmonë pranë besimtarëve myslimanë shqiptarë që jetojnë përtej kufijve. Po ashtu ai nënvizoi se marrëdhënia e mirë që i ka karakterizuar deri më sot të dy bashkësitë do të konkretizohet më tej në fusha të ndryshme me interes të përbashkët.

  

Pajtohuni

Regjistrohuni në listën tonë të POSTIMEVE


© Të gjithë të Drejtat e Rezervuara 2021 Komuniteti Mysliman i Shqipërisë