Kryetari i Komunitetit Mysliman, z. Skender Bruçaj, vizitoi Panairin e Librit “Tirana 2014”, i cili po zhvillohet si çdo vit në Pallatin e Kongreseve në Tiranë.
I shoqëruar nga nënkryetari Ali Zaimi dhe drejtori i Kulturës Genti Kruja, kryetari Bruçaj vizitoi stendat e shumë shtëpive botuese nga Shqipëria, Kosova e Maqedonia, për t’u njohur nga afër me punën serioze që ata bëjnë për t’i ofruar shoqërisë shqiptare botime cilësore e me vlerë.
Kryetari Bruçaj u ndal edhe në stendat e shtëpive botuese islame. Ai vlerësoi rolin e tyre në përgatitjen e botimeve cilësore dhe kontributin e tyre të çmuar për pasurimin e literaturës islame në gjuhën shqipe.
Sipas z. Bruçaj, ky organizim, që është ngjarja më e madhe kulturore, duhet të shihet si një mundësi e mirë për pasqyrimin dhe promovimin e librit islam.
Komuniteti Mysliman i Shqipërisë merr pjesë prej shumë vitesh në panairin vjetor të librit, duke u prezantuar me shumë nga botimet e tij, të cilat vijnë në përputhje me kërkesat dhe nevojat e lexuesve.
Në Panairin e 17 të Librit marrin pjesë rreth 100 shtëpi botuese vendase e të huaja, institucione të arsimit të lartë dhe organizata të tjera që punojnë me librin.
Panairi i cili filloi më 12 nëntor, do të qëndrojë i hapur deri më 16 nëntor 2014.
14 Nëntor 2014