simpoziumi bektashinjve (6)

Kryetari i Komunitetit Mysliman të Shqipërisë, Skender Bruçaj, mori pjesë në simpoziumin ndërkombëtar “Roli i bektashizmit në sendërtimin e dialogut ndërfetar në Ballkan”, të organizuar nga Kryegjyshata Botërore Bektashiane.

Fjala e Kryetarit Skender Bruçaj

I nderuar President i Republikës së Shqipërisë, Shkëlqesia e tij, Z. Bujar Nishani

I nderuar Haxhi Baba Edmond Brahimaj!

I nderuar Kryetar i Bashkësisë Islame të Kosovës, Naim Efendi Tërnava,

Të nderuar Përfaqësues të Komuniteteve Fetare në Shqipëri,

I nderuar Kryetar i Komitetit të Kulteve, z. Hoxholli,

Të nderuar akademikë, miq dhe të ftuar!

Islami dhe gjurmët e tij në Ballkan dhe në trojet shqiptare janë shumë të hershme. Faktet dëshmojnë për praninë e Islamit, që me kontaktet arabo-islame me Ballkanin, zbuluar këto nga studiues dhe historianë vendas dhe të huaj.

Prandaj, duke u nisur edhe nga hershmëria e tyre, këto lidhje kanë lënë gjurmë të thella në trevat ballkanike e më gjerë.

Sipas burimeve të shkruara, për sa i përket figurave kryesore të thirrësve myslimanë, që përmenden në historikun e Islamit në viset tona, është figura e Sari Salltëkut, si i pari thirrës mysliman që ka ardhur në Shqipëri.

Mirëkuptimi dhe toleranca ndërmjet qytetërimeve e përjetuar në Ballkan gjatë një periudhe disa shekullore është rezultati me i bukur i jetesës sipas parimeve islame. Një nga veçoritë, që e dallon qytetërimin Islam është bashkëjetesa e pjesëtarëve të feve dhe popujve të ndryshëm.

Një diçka tjetër që tërheq vëmendjen tek ne është edhe prania e tarikateve të ndryshme, që ky popull i vogël dhe ndër më të vjetrit nga të gjithë popujt e tjerë të Ballkanit dhe Evropës mbajti brenda këtë larmi besimesh dhe kulturash. Tarikati Bektashi, siç thotë edhe Haxhi Bektash Veliu, si dhe Dede Reshati (Zoti i mëshiroftë!), është një pjesë e pandarë e Islamit, është një frymëzim mistik, që me frytet e veta ushqeu zemrat e etura të besimtarëve.

Fryma e këtij Tarikati ndikoi në vendosjen dhe fuqizimin e marrëdhënieve të mira mes anëtarëve të shoqërisë dhe bashkësisë së këtyre trevave me përkatësi të ndryshme fetare. Respekti i ndërsjellë dhe dialogu paqësor dhe mirëdashës është themel i predikimit të Tarikatit Bektashi dhe gjithashtu simbol i mirëkuptimit të tolerancës dhe vëllazërimit të shprehur mes pasuesve të feve të ndryshme në trojet shqiptare të kohëve të lashta dhe të kohës moderne në të cilën jetojmë.

Mistika e këtij tarikati e brumosur dhe e frymëzuar nga mësimet islame arriti të bëhej një urë komunikimi dhe bashkëpunimi, e cila la gjurmë të thella në popullsinë e trevave shqiptare.

Më lejoni së fundmi, që në emër të Komunitetit Mysliman të Shqipërisë t’i uroj udhëheqësve dhe besimtarëve myslimanë të Tarikatit Bektashi suksese në misionin e tyre për përhapjen e vlerave të fesë Islame, dhe veçanërisht për punën e tyre të palodhur për ndërtimin e dialogut e mirëkuptimit ndërfetar në Shqipëri dhe më gjerë.

I uroj suksese këtij simpoziumi dhe të gjithë panelistëve dhe studiuesve që do marrin pjesë në këtë simpozium.

Ju faleminderit!

 

 

 

Pajtohuni

Regjistrohuni në listën tonë të POSTIMEVE


© Të gjithë të Drejtat e Rezervuara 2021 Komuniteti Mysliman i Shqipërisë