PROFETI MUHAMED  (2)

Mijëra qytetarë shqiptarë, u bënë pjesë e programit festiv në përkujtim të Profetit Muhamed, paqja qoftë mbi të, organizuar për të njëmbëdhjetin vit radhazi nga Komuniteti Mysliman i Shqipërisë dhe Fondacioni Kulturor e Arsimor “Sema”.

Kryetari i Komunitetit Mysliman të Shqipërisë, z. Skender Bruçaj, duke folur

për personalitetin që la gjurmë të pashlyeshme në kujtesën e historisë njerëzore, u shpreh se  mesazhi që solli Profeti është mesazhi i  jetës, i dashurisë dhe i mëshirës.

“Të gjithë profetët u kanë folur popujve të ndryshëm, ndërsa Muhamedi a.s. erdhi si mëshirë për të gjitha botërat. Mesazhi që solli Profeti është mesazhi i  jetës, i dashurisë dhe i mëshirës. Profeti Muhamed a.s. na mësoi se qëllimi i Islamit është promovimi i paqes, i mirëkuptimit, i drejtësisë, i sigurisë dhe garantimit të dinjitetit njerëzor, duke respektuar në thelb diversitetin njerëzor.”, tha z. Bruçaj.

Kryetari Bruçaj, tha  më tej se Profeti Muhamed a.s., na mësoi se, një mysliman i mirë duhet të jetë gjithnjë i drejtë dhe i qëndrueshëm në fjalët dhe veprat e tij. Ai duhet të respektojë të gjitha vlerat e shenjta të besimeve te ndryshme fetare, njëlloj siç dëshiron që të tjerët të tregojnë respekt karshi fesë (besimit) dhe vlerave të tij.

Ndërsa Kryeministri i vendit z. Edi Rama, i pranishëm në këtë aktivitet, vlerësoi figurën e Profetit Muhamed a.s. teksa theksoi se njerëzimi nuk mund të bënte pa të dhe pa mesazhet e tij.

Kryeministri Rama, gjithashtu vlerësoi rolin dhe kontributin e Komunitetit Mysliman në këto vite. “Unë e përshëndes dhe si kryeministër, jam krenar për Komunitetin Mysliman shqiptar, një komunitet që në çdo moment ka luajtur një rol emancipues dhe paqëtues për kombin tonë. Një komunitet i cili sot e mbështet plotësisht projektin tonë të ri për ta kthyer shkollën publike në një hapësirë njohëse jo vetëm për shkencat por edhe për fenë.”, tha z. Rama.

Kryeministri i vendit u shpreh se ka ardhur momenti që shteti shqiptar të hapë dyert në shkolla që nxënësit të pajisen me njohuritë fetare, përveç atyre shkencore dhe se kjo nuk e cenon aspak laicitetin e shkollës sonë por në forcimin e themeleve të kulturës laike, e cila është e dobët dhe e pafuqishme që të përballet me format e ekstremizmit të dhunshëm.

“Kulti islam në qasjen e tij qytetëruese dhe tolerante ka promovuar në këtë vend shkollimin dhe kulturën dhe këtë shumë pak e dinë.”, tha më tej z. Rama.

Fjalë përshëndetëse mbajti edhe kreu i bektashinjve Haxhi Dede Edmond Brahimaj, i cili i shpreh se ne kemi një trashëgimi të vyer si ajo që na la Profeti Muhamed.

Kur’ani, ilahitë dhe pjesët e zgjedhura poetike të përcjella me mjeshtëri nga emrat e njohur të skenës dhe ekranit shoqëruan programin në përkujtim të Profetit të Mëshirës.

Si zakonisht programi erdhi nën regjinë e Agron Hoxhës dhe udhëheqësit artistik, mjeshtrit të merituar, Kujtim Alia.

Pjesë e programit ishte edhe një  panair me produkte të ndryshme si: ushqime, libra, punime artistike, etj., të ardhurat e të cilit do të shkojnë për familjet në nevojë.

Në këtë organizim festiv morën pjesë shkrimtarë, artistë dhe përfaqësues të botës së artit dhe kulturës nga Shqipëria dhe hapësira mbarëshqiptare.

9 prill 2015

 

 

PROFETI MUHAMED  (1)  PROFETI MUHAMED  (3)PROFETI MUHAMED  (7) PROFETI MUHAMED  (5) PROFETI MUHAMED  (6)  PROFETI MUHAMED  (8) PROFETI MUHAMED  (9) PROFETI MUHAMED  (10)

Pajtohuni

Regjistrohuni në listën tonë të POSTIMEVE


© Të gjithë të Drejtat e Rezervuara 2021 Komuniteti Mysliman i Shqipërisë