Kryetari i Komunitetit Mysliman të Shqipërisë, H. Bujar Spahiu, priti në selinë e institucionit z. Mensur Halili, Kryetar i Unionit të Bashkësive Islame Shqiptare në Gjermani.
Kryetari Spahiu i shprehu mirënjohjn e tij z. Halili për vizitën dhe vlerësoi kontributin e këtij të fundit në promovimin e vlerave tona fetare dhe atyre kombëtare në Gjermani.
Ndërsa z. Halili vlerësoi punën e Komunitetit Mysliman të Shqipërisë dhe rëndësinë e tij, jo vetëm për jetën fetare dhe organizimin e saj brenda vendit, por edhe si shembull i shkëlqyer për komunitetin shqiptar që jeton e punon në diasporë.
Gjatë takimit u bisedua mbi bashkëpunimet e mëparshme dhe mundësitë e avancimit të partneritetit në fushën e përçimit të mesazhit islam, si dhe në organizimin e jetës fetare të diasporës shqiptare në këtë vend mik.
Në përmbyllje të takimit, u shkëmbyen dhurata simbolike si shenjë respekti dhe bashkëpunimi të frytshëm.
Gjatë këtij takmi, kryetari Spahiu shoqërohej nga Nënkryetari i KMSH-së z. Lauren Luli dhe Drejtori i Kabinetit z. Aurel Çani.
