Drejtuesit Myslimanë të rajonit dënojnë sulmet terroriste

Udhëheqësit fetarë të besimit islam nga Kosova, Shqipëria e Maqedonia u ngritën edhe një herë kundër sulmeve terroriste, duke i cilësuar krime, ato që marrin jetë njerëzish të pafajshëm.

Përfaqësues të bashkësive islame nga të gjitha shtetet e rajonit u bashkuan me këtë këshillë, në ceremoninë e promovimit të veprës së myftiut të Bashkësisë Islame të Kosovës, Naim Tërnava, me titullin “Ligjërime për fenë e atdheun”.

Kryetari i Komunitetit Mysliman të Shqipërisë, i pranishëm në aktivitet u shpreh se jeta e njeriut është e shenjtë, e paprekshme dhe askush nuk ka të drejtë, që në emër të një ideologjie të marrë jetën e njerëzve të pafajshëm.

“Kohët e sotme po përjetojmë një periudhë krizash të padëgjuara. Nga njëra anë janë ata, që janë orientuar drejt dhunës, vdekjes e shkatërrimit, gjoja me motivim fetar; dhe nga ana tjetër njerëzit që po i vuajnë këto akte. Myslimanët i kanë dënuar dhe vazhdojnë t’i dënojnë aktet e dhunës dhe të terrorit kudo që ndodhin. Jeta e njeriut është e shenjtë, e paprekshme dhe askush nuk ka të drejtë, që në emër të një ideologjie të marrë jetën e njerëzve të pafajshëm. Ky është një krim që i bëhet të gjithë njerëzimit”, tha z. Bruçaj.

Ky mesazh vjen në një kohë kur e gjithë Europa, përfshirë Kosovën, ka rritur alarmin e sigurisë.

Ndërsa sa i përket botimit të Myftiut Tërnava, kreu Bruçaj, u shpreh: “Qëndrimet zyrtare në rrugëtimin e Naim Tërnavës si Myfti i Kosovës dhe drejtues i një institucioni përgjegjës për besimtarët mysliman të Kosovës, të shprehura në një format të përmbledhur në këto  dy vëllime tregon shumë qartë kumtimin e një zëri të fortë institucional në mbrojtje të identitetin të myslimanëve dhe promovimit të vlerave të islamit në Kosovë, por jo vetëm.”

I pranishëm në këtë takim ishte edhe Kryetari i Këshillit të Përgjithshëm të KMSH, Islam Hoxha,  Drejtori i Kulturës, Genti Kruja si dhe Drejtori i Çështjeve Sociale, Edvin Kuçi.

Gjatë vizitës në Prishtinë kreu bruçaj është ndalur edhe për një vizitë të shkurtër në Bashkësinë Islame të Kosovës.

24 Nëntor 2015