Bashkëjetesa dhe dialogu ka mbledhur akademikë dhe studiues të shumtë në Nigeri, në një konferencë ndërkombëtare të organizuar nga revista prestigjioze ndërkombëtare Fountain në bashkëpunim me një qendër dialogu në Abuja, kryeqytet i Nigerisë. Konferenca është zhvilluar nën kujdesin e Ministrisë së Arsimit të Nigerisë dhe me mbështetjen e gjashtë universiteteve nigeriane. Ministrja e Arsimit Prof. Ruqayyatu Ahmed Rufai ka hapur edhe konferencën, duke vënë theksin mbi rëndësinë e organizimit të këtij aktiviteti në vendin e saj.
Pjesë e kësaj konferencë kanë qenë edhe përfaqësues nga Shqipëria, të cilët ishin drejtori i Kulturës dhe Dialogut Ndërfetar në KMSH z. Genti Kruja, si dhe shefi i departamentit të Filozofisë në Fakultetin e Shkencave Sociale të Universitetit të Tiranës Prof. As. Dr. Gjergj Sinani.
Pjesëmarrës të shumtë nga Evropa, Afrika dhe Azia, për dy ditë radhazi kanë folur për rëndësinë e dialogut dhe bashkëjetesës në një rajon të konflikteve dhe përplasjeve. Krahas botës akademike, kanë marrë pjesë gjithashtu edhe përfaqësues të pushtetit qendror dhe lokal, ambasadorë të vendeve të ndryshme, si dhe klerikë myslimanë dhe kristianë, të cilët të gjithë së bashku kanë dhënë mesazhe paqeje dhe bashkëpunimi.
