Muzeu i artit në Los Anxhelos ka hapur dyert e tij për artin dhe kulturën islame. Më shumë se 250 vepra dhe punime arti me vlera të jashtëzakonshme dhe me një gjeografi të pasur janë eksopozuar në këtë institucion të rëndësishëm të trashëgimisë së artit e kulturës planetare.
Në ekspozitën e çelur me 5 qershor paraqiten punime të rralla të punuara në tekstil, qelq dhe materiale të tjera, që datojnë nga periudha të ndryshme dhe janë dëshmi e qartë për interesin që myslimanët kishin për artin dhe për të bukurën.
Një qilim nga Ardebili, i punuar në vitin 1539, për të cilin thuhet se e ka përdorur shahu Tahmaseb si shtrojë për mauzoleun e paraardhësve të tij në Iranin veriperëndimor dhe mbulesa të punuara me dorë për mbulimin e Qabesë, të punuara në Egjipt e të dërguara në Mekë, janë disa prej punimeve të paraqitura në këtë ekspozitë.
Për vetë gamën e gjerë të punimeve të paraqitura, ekspozita pritet të tërheqë një numër të madh vizitorësh. Nga burime të muzeut mësohet se ajo do të qëndrojë e hapur deri më 4 shtator 2011.
