Me faljen e dy rekateve namaz, ministri i Shëndetësisë i Republikës së Maqedonisë z. Bujar Osmani, lëshoi zyrtarisht në përdorim faltoren myslimane në Qendrën klinike të Shkupit. Ministri Osmani theksoi se ky objekt fetar do t’i mundësojë personelit mjekësor, pacientëve dhe familjarëve të tyre të kryejnë obligimet e tyre fetare. Sipas tij, ky objekt u projektua pas kërkesave të shumta të pacientëve të përkatësisë myslimane.
Faltorja e re ndodhet në afërsi të spitalit të fëmijëve dhe është i pari i këtij lloji në rajon. “Është kjo një kërkesë e hershme e pacientëve, është kërkesë e organizatave për mbrojtjen e të drejtave të pacientëve, është një praktikë e qendrave shëndetësore moderne në Evropë, është praktikë në sektorin privat në Maqedoni”, tha ministri i Shëndetësisë Bujar Osmani.
Mjekët, pacientët dhe qytetarët shprehen se ky objekt fetar, do të ndikojë në shërimin shpirtëror të njerëzve, por do të jetë edhe nxitje për autoritetet për përmirësimin e kushteve të tjera nëpër spitale. “Sigurisht që është një nevojë e kohës, për faktin se është rritur numri i punonjësve të cilët i përkasin fesë islame dhe lutja/namazi është një obligim për çdo besimtar”, tha mjeku Rexhep Memedi.
“Po, është mirë të ekzistojë, për shkak të sëmurëve që gjenden këtu, dhe ka nevojë për gjithë popullatën. Kjo do të ndikojë edhe në përmirësimin e kushteve të tjera, sepse çka është fetare është e respektuar nga të gjithë”, u shpreh një qytetar.
Përveç objektit fetar islam, në qendrën klinike të Shkupit, prej vitesh ekziston edhe kisha të cilën e shfrytëzojnë pacientët e krishterë. Objekte të tilla fetare në kuadër të qendrave spitalore, tanimë janë praktikë në shumë shtete të Bashkimit Evropian, varësisht nga përkatësia fetare e pacientëve.
