Në emër të Allahut, Mëshiruesit, Mëshirëbërësit
DISPOZITA TË PËRGJITHSHME
Islami është feja e shoqërisë njerëzore që u është shpallur të gjithë profetëve nga Ademi (a.s.) e deri tek Muhamedi (a.s.), ashtu siç thuhet në Kur’anin Fisnik. Me Islam që do të thotë paqe kuptohet besimi dhe ligjshmëria që Allahu i Madhëruar i zbriti Profetit Muhamed (a.s.), për të qenë feja që do të udhëheqë njerëzimin deri në fund të ekzistencës së tij, për të arritur lumturinë e kësaj bote dhe mirësitë e botës tjetër.
Neni 1
Bashkësia Islame, Komuniteti Mysliman i Shqipërisë, është organizatë fetare jopolitike e pavarur nga shteti, ku përfshihen të gjithë besimtarët myslimanë në territorin e Republikës së Shqipërisë që pranojnë dhe zbatojnë parimet themelore të fesë Islame.
Sigla e Komunitetit Mysliman të Shqipërisë është KMSH.
Neni 2
Komuniteti Mysliman i Shqipërisë ka qëllim fetar e bamirës. Në ushtrimin e veprimtarisë së tij, ai ka si objekt të përhapë, zgjojë dhe forcojë tek besimtarët myslimanë besimin Islam, të mbrojë dinjitetin, të drejtat dhe interesat e myslimanëve, të rrisë e zhvillojë ndjenjën e dashurisë e të besnikërisë për atdheun dhe popullin shqiptar. Shkolla juridike për zbatimin e riteve fetare nga Komuniteti Mysliman i Shqipërisë në Republikën e Shqipërisë, është shkolla Juridike Hanefi, e cila e mbështet të gjithë veprimtarinë e saj në Kur’an dhe traditën Profetike.
Neni 3
Selia e Komunitetit Mysliman të Shqipërisë është në Tiranë, Rr. “Presidenti George Bush”, nr. 50.
Neni 4
Stema e Komunitetit Mysliman të Shqipërisë është xhamia “Et’hem Bej” - Tiranë.
Neni 5
Vula e Komunitetit Mysliman të Shqipërisë është e rrumbullakët, në mes ka figurën e xhamisë “Et’hem Bej” - Tiranë, për rreth xhamisë është shkruar, Republika e Shqipërisë, Bashkësia Islame, Komuniteti Mysliman i Shqipërisë, Kryesia.
Neni 6
Gjuha zyrtare e Komunitetit Mysliman të Shqipërisë është gjuha shqipe.
Gjatë kryerjes së riteve fetare (faljes), përdoret vetëm gjuha arabe.
Neni 7
Komuniteti Mysliman i Shqipërisë është person juridik.
Komuniteti Mysliman i Shqipërisë e ushtron veprimtarinë e tij në të gjithë territorin e Republikës së Shqipërisë nëpërmjet Myftinive të Zonave, Myftinive të Rretheve dhe Nënmyftinive.
Neni 8
Komuniteti Mysliman i Shqipërisë është i vetmi person juridik që ushtron aktivitet fetar, arsimor, dhe kulturor të besimit Islam në Republikën e Shqipërisë.
Komuniteti Mysliman i Shqipërisë ushtron edhe aktivitet ekonomik dhe humanitar nëpërmjet ndihmave që grumbullohen nga donatorët brenda dhe jashtë vendit, duke respektuar dhe zbatuar Kushtetutën dhe legjislacionin e Republikës së Shqipërisë.
Neni 9
Komuniteti Mysliman i Shqipërisë për realizimin e qëllimit dhe objektit të veprimtarisë së tij fetare ka të drejtë të ndërtojë xhami dhe objekte të tjera në funksion të tyre, ku do të kryhen ceremoni e rite fetare, veprimtari social-kulture dhe humanitare.
Komuniteti Mysliman i Shqipërisë ka të drejtë të hapë qendra kulturore, kurse fetare, shkolla parauniversitare të të gjitha niveleve dhe universitete në bazë të akteve ligjore dhe nënligjore për sistemin arsimor parauniversitar dhe për arsimin e lartë në Republikën e Shqipërisë.
Komuniteti Mysliman i Shqipërisë boton gazetën e vet “Drita Islame” dhe revista e botime të tjera fetare e social-kulturore.
Komuniteti Mysliman i Shqipërisë ka të drejtë të ngrejë stacione radio e televizioni për predikimin e fesë Islame dhe pasqyrimin e veprimtarive të tij fetare, arsimore, social-kulturore dhe humanitare, në bazë të akteve ligjore e nënligjore për radion dhe televizionin publik dhe privat në Republikën e Shqipërisë
Neni 10
Kohëzgjatja e Komunitetit Mysliman të Shqipërisë është pa afat.
Neni 11
Besimtarët myslimanë e ushtrojnë sovranitetin e tyre nëpërmjet organeve përfaqësuese e drejtuese të Komunitetit Mysliman të Shqipërisë
Neni 12
Festat zyrtare fetare të besimit islam janë:
1. Fitër Bajrami (Bajrami i Madh)
2. Kurban Bajrami (Bajrami i Vogël)...
