Komuniteti Mysliman, Drejtoria e Kulturës, ka bërë të mundur nxjerrjen e vëllimit të parë të Vjetarit të Aktiviteteve të një viti, duke filluar nga Shtatori 2010 deri në Tetor 2011, si një buletin voluminoz, i cili sheh dritën e botimit për herë të parë në llojin e vet.
Ky botim i kataloguar me ISBN në Bibliotekën Kombëtare, vjen si një botim special me 150 faqe, me letër luksoze, e pasur me 300 fotografi me ngjyra të aktiviteteve të shumta, zhvilluar gjatë një viti të gjatë dhe të ngjeshur me ngjarje të mëdha dhe të rëndësishme për institucionin e Komunitetit Mysliman të Shqipërisë, në qendër dhe në rrethe.
Vjetari i Aktiviteteve do të pasohet çdo vit me vëllimet në vijim për aktivitetet e një viti të tërë, duke bërë të mundur kështu njohjen e lexuesve me të gjitha aktivitetet kryesore të institucionit të KMSH-së.
Botimi i këtij viti do të shpërndahet për të gjitha institucionet zyrtare dhe drejtuesit e tyre, pushtetit qendror dhe atij lokal, nëpërmjet KMSH-së dhe myftinive të çdo rrethi të Shqipërisë.
