Kryeministri Berisha ka shtruar një drekë, në rezidencën qeveritare ditën e enjte me dt. 22.12.2011, për drejtuesit e komuniteteve fetare. Në të ishin të pranishëm edhe kryetari i KMSH-së H. Selim Muça, myftinjtë e rretheve Shkodër, Durrës, Korçë dhe Elbasan, si dhe përfaqësues të komuniteteve të tjera fetare në vend.
Krahas komuniteteve fetare morën pjesë gjithashtu edhe përfaqësues të trupit diplomatik, si Ettore Sequi, Ambasadori i Pranisë së OSBE-së në Shqipëri, Eugen Wollfarth, ai i Vatikanit Ramiro Moliner Ingles, etj.
Gjatë drekës, nga pjesëmarrësit u dhanë mesazhe të bashkëjetesës e të harmonisë fetare.
Në përshëndetjen e tij, Kryeministri Berisha shprehu vlerësimin për kontributin e rolin e tyre frymëzues, në konsolidimin e infrastrukturës shpirtërore të kombit shqiptar dhe kultivimit të mesazhit të çmuar të mirëkuptimit e harmonisë.
“Në 100 vjet, - tha Kryeministri - udhëheqësit shpirtërorë të shqiptarëve kanë pasur nga Lidhja e Prizrenit deri në ditën e sotme, një rol themelor në zhvillimet pozitive të këtij kombi, kanë gjetur në të gjitha rastet mirëkuptimin e përbashkët, për të çuar përpara një çështje të drejtë, lirisë kombëtare.”
Në përshëndetjen e tij, Kryeministri Berisha u shpreh:
“Së pari, unë dëshiroj t’ju falënderoj me shumë përzemërsi që jeni sot këtu, në këtë drekë, në të cilën unë dua të shpreh nderimin tim më të thellë për ju dhe punën e madhe dhe me përkushtim të veçantë që ju bëni në ndërtimin dhe konsolidimin e infrastrukturës shpirtërore të kombit shqiptar. Roli dhe kontributi juaj është themelor dhe është frymëzues. 20 vjet më parë, për rrethana të caktuara, Shqipëria ishte vendi i lindjes apo më e drejtë është të themi rilindjeve, rilindjes së besimeve, rilindjes së pluralizmit politik, atij pronësor etj., por ajo rilindje që ka ecur e është zhvilluar në mënyrën më njerëzore e të civilizuar jeni ju, besimet fetare, të cilat jeni bërë një shembull frymëzues për shoqërinë shqiptare, por dua të theksoj se jo vetëm për shoqërinë shqiptare. Në rast se ka një mesazh të madh, të çmuar, që ne mund ta përcillnim në rajon, Europë e në botë është mesazhi që ju e rikultivuat - pasi ka ekzistuar - me kaq njerëzit, kaq përkushtim e dashuri për njerëzit e vendin, me kaq besim tek Zoti.”
Kryeministri Berisha ka uruar gjithashtu edhe Krishtlindjet për besimtarët e krishterë, duke vlerësuar figurën e Krishti (Hz. Isait a.s.) edhe sipas Kur’anit, si një Profet që kontribuoi në normat morale të njerëzimit.
