Kryetari i KMSH-së H. Selim Muça sëbashku me rektorin e Universitetit Bedër Dr. Ferdinand Gjana kanë vizituar ditën e enjte me dt. 24 nëntor 2011 Universitetin e Vienës, në Austri.
Gjatë kësaj vizite krahas takimeve të tjera, ata janë pritur edhe nga Shefi i Departamentit të Mësuesisë së Fesë Islame në këtë Universitet, Prof. Dr. Ednan Aslan.
Prof. Aslan, i ka informuar vizitorët në lidhje me programet akademike dhe projektet shkencore të organizuara nga ky departament.
Prof. Aslan ka thënë gjithashtu, se nga ky departament studentët marrin formimin e nevojshëm për t’u bërë mësues të lëndës së njohurive fetare islame në shkollat publike të Austrisë.
Austria është një nga vendet e BE-së, i cili njeh zyrtarisht fenë islame dhe jep mundësinë e marrjes së lëndës së njohurive islame në kurrikulën shkollore për të gjithë ata nxënës të cilët bëjnë një kërkesë të tillë pranë shkollave ku ata studiojnë.
Nevojat e stafit pedagogjik në këto shkolla plotësohen me të diplomuarit nga ky departament, të cilët marrin njohuritë dhe formimin e duhur të besimit islam, si dhe njohin nga afër kulturën evropiane.
Universiteti i Vjenës (Universität Wien) u themelua në 1365 nga Duka Rudolf IV, duke qenë kështu një nga universitetet më të vjetra në Evropë.
Kryetari i KMSH-së H. Selim Muça dhe rektori i Universitetit Bedër Dr. Ferdinand Gjana janë në një vizitë disa ditore në Austri.
