Pas kalimit të natës së tetë në Mina, të gjithë haxhinjtë nga Shqipëria janë drejtuar për në Arafat, bazuar në thënien e Profetit a.s., që thotë se, “Haxhi është Arafat”.
Pas faljes së namazit të drekës dhe ikindisë, haxhinjtë kanë dëgjuar predikimin e kësaj dite të shënuar. Në fjalën e tij nënkryetari Komunitetit Mysliman të Shqipërisë H. Bujar Spahiu falënderoi Zotin për mirësitë e tij të panumërta.
Sipas tij, në këto ditë dhe në këto vende adhurimet marrin të tjera vlera. Ai u kujtoi haxhinjve se këto ditë lidhen me tre ngjarje të rëndësishme si: haxhi, kurbani dhe përfundimi i shpalljes së Kur’anit.
“Le t’i lutemi Zotit nga ky vend i bekuar për të mirën e myslimanëve, shqiptarëve dhe mbarë njerëzimit! Zoti na faltë, na mëshiroftë, e na i pranoftë të gjitha adhurimet”, përfundoi fjalën e tij z. Spahiu.
308 haxhinjtë shqiptarë ndodhen prej tetë ditësh në qytetin e shenjtë të Mekës, në shoqërinë e miliona besimtarëve myslimanë nga mbarë bota. Gjendja e tyre shëndetësore paraqitet e mirë. Në çdo moment ata kanë pranë kujdesin e dy mjekëve specialistë dhe të stafit të shërbimit. / Haxhi Lika - Arafat Meke
