Kryetari i Komunitetit Mysliman të Shqipërisë, H. Selim Muça i ka dërguar një mesazh ngushëllimi presidentit turk Abdullah Gyl dhe kryeministrit Rexhep Tajjip Erdogan, për tragjedinë e ndodhur nga tërmeti që goditi pjesën jug-lindore të Turqisë, me një bilanc paraprak 459 të vdekur dhe qindra të plagosur.
“Lajmi për humbjen e jetës të bashkëqytetarëve tuaj në tërmetin e ndodhur para disa ditësh në pjesën lindore të Turqisë shkaktoi tek ne një pikëllim të thellë. Në këto çaste të vështira që po kaloni, më lejoni që në emrin tim personal dhe të myslimanëve të Shqipërisë t’ju shpreh juve, popullit tuaj dhe familjeve të viktimave ngushëllimet më të sinqerta për humbjen e familjarëve dhe njerëzve të tyre të dashur!”, thekson Kryetari Muça.
Në mesazhin e tij H. Selim Muça ka ngushëlluar dy autoritetet më të larta të shtetit turk edhe për viktimat e aksidentit tragjik të ndodhur në ujërat e detit Adriatik. “Shprehim nderimin tonë në kujtim të shtetasve turq që humbën jetën si pasojë e tragjedisë së ndodhur në ujërat e detit Adriatik dhe i lutemi Zotit që t’u japë forcë e durim njerëzve të tyre për të përballuar dhimbjen e madhe që shkakton humbja e pazëvendësueshme e një të afërmi”, shkruhet në mesazhin e kreut të KMSH-së.
