Një delegacion i ardhur nga Arabia Saudite, i kryesuar nga zv/ministri për çështjet fetare Abdul Aziz Al- Amar, vizitoi KMSH-në në dt. 18.10.2011. Kjo vizitë u zhvillua në kuadër të takimeve që ky delegacion bëri në disa institucione të rëndësishme në vendin tonë.
Miqtë u pritën në ambientet e KMSH-së nga nënkryetari Bujar Spahiu, drejtori i Marrëdhënieve me Jashtë, z. Astrit Zharri, drejtori i Arsimit, z. Altin Shima etj. Takimin e çeli nënkryetari Spahiu, i cili, pasi i uroi mirëseardhjen falënderoi në emër të institucionit për mbështetjen dhe kontributin e Mbretërisë së Arabisë Saudite për Shqipërinë. Në vijim, z. Spahiu bëri një përmbledhje të veprimtarisë së institucionit që nga rithemelimi i tij e deri sot ku mes të tjerash theksoi se KMSH ka një aktivitet të pasur dhe bashkëpunon me institucione shtetërore dhe organizata të ndryshme jofitimprurëse në projekte që i shërbejnë zhvillimit kulturor, edukativ e fetar të individit dhe shoqërisë.
Nga ana e tyre miqtë vlerësuan punën e KMSH-së dhe kontributin që ai jep në shërbim të përhapjes së Islamit dhe forcimit të paqes dhe harmonisë ndërfetare në Shqipëri e në rajon.
Z. Spahiu foli më pas për disa nga projektet më të rëndësishme të KMSH-së aktualisht dhe për disa nga ambiciet e tij për të ardhmen.
Në fund, vizitorët garantuan drejtuesit e KMSH-së se Mbretëria e Arabisë Saudite do të vazhdojë të mbështesë institucionin në projektet e tij në dobi të myslimanëve dhe në interes të shoqërisë shqiptare.
