Kryetari H. Selim Muça priti me dt. 7 tetor 2011, i shoqëruar nga disa anëtarë të kryesisë, përfaqësuesin e Komisionit të Jashtëm të Parlamentit të Kuvajtit, z. Muhamed Haif el Mutejri.
Kryetari Muça, pasi i uroi mirëseardhjen shprehu kënaqësinë e veçantë për këtë takim dhe vuri në dukje se vizitat e kësaj natyre ilustrojnë jo vetëm marrëdhëniet miqësore mes dy vendeve dhe popujve tanë, por edhe kujdesin e veçantë që ky shtet tregon për zhvillimet e Islamit dhe interesat e myslimanëve në Shqipëri.
Kreu i KMSH-së e vlerësoi si tepër të rëndësishëm e domethënës përkrahjen e vazhdueshme të Kuvajtit në ndihmë të institucionit në këto dy dekada të rikthimit të Islamit në jetën e shqiptarëve. Gjatë bisedës z. Muça e njohu zyrtarin nga Kuvajti me historikun, arritjet dhe sfidat e Komunitetit Mysliman të Shqipërisë. Një pikë e rëndësishme diskutimi ishte vendimi i KMSH-së për ndërtimin e xhamisë së re në Tiranë në truallin e Namazgjas, për realizimin e së cilës z. Muça kërkoi ndihmën e Kuvajtit dhe vendeve të pasura të botës islame.
Nga ana e tij, z. Muhamed Haif Mutejri shprehu vlerësimet më të mira për kryetarin dhe drejtuesit islamë në qendër dhe në rrethe, për kontributin e tyre në evidentimin e vlerave islame dhe përpjekjet e vazhdueshme në edukimin e gjeneratave në frymën e parimeve të edukatës dhe normave të moralit islam.
Parlamentari kuvajtian premtoi se do të ndihmojë që ky bashkëpunim i frytshëm të intensifikohet në vazhdim me financimin e projekteve në fusha të ndryshme në përputhje me nevojat e institucionit dhe të besimtarëve.
H. Selim Muça i uroi z. Mutejri suksese e mbarësi në detyrën e tij, si dhe i dhuroi një panoramë me xhaminë monumentale të Tiranës “Et’hem Beu”. Ndërsa z. Mutejri i dhuroi në shenjë respekti z. Muça objektin në miniaturë të selisë së Parlamentit të Kuvajtit.
