Një delegacion i përbërë prej nënkryetarit të KMSH-së, z. Bujar Spahiu dhe kancelarit Ali Zaimi zhvilluan një vizitë dy ditore në Zvicër ku janë takuar me përfaqësues të ndryshëm të komunitetit shqiptar, me qëllim për t’u njohur nga afër me jetën dhe veprimtarinë e myslimanëve dhe shqiptarëve në Zvicër.
Një vend të rëndësishëm në këtë vizitë zunë takimet në disa xhami siç ishin: Xhamia e Bardhë në Aarburg, e Langenthalit, e Reinach Ag etj, ku delegacionit shqiptar iu rezervua një pritje e ngrohtë dhe vëllazërore.
Në fjalën e mbajtur përpara xhematit të këtyre xhamive, nënkryetari Spahiu inkurajoi besimtarët myslimanë shqiptarë për t’u integruar e jetuar në harmoni të plotë me të gjithë qytetarët zviceranë, duke pasqyruar me fjalët, sjelljet dhe veprat e tyre bukuritë e besimit, vlerat e kulturës dhe traditës së pastër islame.
Ndërsa kancelari Ali Zaimi pasi i njohu të pranishmit dhe komunitetin shqiptar me aktivitetin dhe veprimtarinë e KMSH në këto dy dekada, vlerësoi angazhimin dhe përkushtimin e tyre në promovimin dhe ruajtjen e traditës fetare dhe kombëtare.
Në Xhaminë e Aarburgut, imami i saj, z. Nehat Ismaili i njohu miqtë nga Shqipëria me përpjekjet e shqiptarëve për organizimin dhe mbajtjen gjallë të vlerave islame si dhe bashkëpunimit të ngushtë që ekziston midis tyre.
Në këtë xhami tërheqëse të hapur me investimet e vetë xhematit bie në sy vetëdija e anëtarëve të saj për përfaqësimin sa më të mirë të vlerave islame. Në xhaminë e Reinach anëtarët e këshillit të xhamisë vunë theksin në nevojën e bashkëpunimit të vazhdueshëm me interes reciprok.
Nëpërmjet pyetjeve të shumta, një interes të veçantë në këto takime u shpreh mbi ecurinë e Universitetit Bedër dhe ndërtimin e Xhamisë së Madhe në Tiranë.
Delegacioni nga Shqipëria i ftoi përfaqësuesit e xhamive të Zvicrës të vizitojnë KMSH dhe institucionet islame në Shqipëri, ftesë e cila u prit me kënaqësi nga ana e tyre. /Drita Islame/
