Miliona besimtarë myslimanë në mbarë botën kanë festuar Kurban Bajramin, festën e paqes, dashurisë dhe barazisë mes njerëzve. Kështu edhe qindra mijëra besimtarë të Tiranës dhe mbarë Shqipërisë kanë festuar me gëzim këtë ditë të madhe.
Ceremonia festive që përkon edhe me haxhin, u organizua në bulevardin “Dëshmorët e Kombit” në sheshin para ish-hotel Dajtit, me pjesëmarrjen e disa dhjetëra mijëra besimtarëve të moshave e shtresave të ndryshme sociale.
Pas faljes së namazit të sabahut besimtarët dhe besimtaret e pranishme në shesh, kanë pritur nën tingujt e ilahive, tekbireve dhe salavateve faljen e namazit të Kurban Bajramit. Fillimisht ceremonia ka filluar me këndimin e ajeteve kur’anore nga Erind Hyka, nxënësi i medresesë, i cili me zërin e tij ka çuar peshë zemrat e njerëzve.
Më pas, bisedën që i parapriu faljes së Kurban Bajramit e mbajti kryetari i Këshillit të Përgjithshëm të KMSH-së H. Ylli Gurra, i cili gjithashtu ka uruar besimtarët për këtë festë të madhe duke falënderuar Zotin për mirësitë që i ka falur shqiptarëve. Z. Gurra falënderoi Allahun e Madhëruar, që bëri të mundur këtë atmosferë të lartë shpirtërore, në përkujtimin e kësaj dite të gëzueshme për të gjithë myslimanët e botës. Ai u ndal më tej në rëndësinë e kësaj feste në të cilën manifestohet dashuria dhe bindja ndaj Zotit dhe respekti e vlerësimi për krijesat e tij.
Duke porositur myslimanët që në jetën e tyre të udhëhiqen nga mësimet e larta islame, z. Gurra iu lut Allahut të Madhëruar për mbarësi, begati e paqe për ta dhe familjet e tyre. Ceremonia vijoi me një program të pasur me tekbire, salavate, ilahi dhe recitime vargjesh të zgjedhura poetike.
Më pas ka përshëndetur edhe kryetari i Komunitetit Mysliman të Shqipërisë, Haxhi Selim Muça, i cili i ka uruar të pranishmit dhe gjithë shqiptarët Gëzuar Kurban Bajramin. “Zoti ju dhëntë paqe begati e lumturi”, ka thënë ndër të tjera z. Muça. Pas kësaj kryetari i KMSH-së H. Selim Muça ka drejtuar edhe faljen e namazit të Bajramit. Pas faljes së Bajramit, besimtarët gjitashtu kanë dëgjuar edhe hutben (ligjëratën) e kësaj dite të shënuar, të mbajtur nga Myftiu i Zonës Tiranë, Hafiz Shaban Saliaj.
Më tej të pranishmit kanë shkëmbyer urimet me njëri tjetrin, duke u shpërndarë dalëngadalë për të vizituar miqtë dhe të afërmit, e për të festuar me familjet e tyre.
Ndryshe nga vitet tjera këtë vit Komuniteti Mysliman i Shqipërisë organizoi dhe shpërndau ushqim për të pranishmit në shesh. Ushqimi konsistonte në asortimentet si mish, ëmbëlsira dhe pije freskuese të ndryshme për më shumë se 5.000 vetë.
