Komuniteti Mysliman ka vijuar me shtrimin e iftareve për besimtarët dhe shtresa të ndryshme të shoqërisë në vazhdimësi të Ramazanit.
Në ditën e 19-të të muajit të faljes, Komuniteti Mysliman i Shqipërisë ka hapur dyert për besimtarët dhe përfaqësues të institucioneve publike dhe personalitete të spikatura të shoqërisë civile.
Iftarin e përshëndeti kryetari i Komunitetit Mysliman të Shqipërisë, H. Selim Muça, i cili në fjalën e tij uroi të gjithë besimtarët myslimanë për një agjërim të lehtë dhe adhurim të pranuar tek Zoti i Plotfuqishëm.
I ftuar në iftar ishte edhe zv/ministri i Arsimit Halit Shamata, i cili uroi gjithashtu besimtarët për këtë muaj të rëndësishëm e me vlera të shumta.
Një tjetër iftar ishte ai i shtruar për Komunitetin Bektashian me dt. 23 gusht. Të ftuarit i përshëndeti nënkryetari i KMSH-së, z. Gazmend Aga. Duke u fokusuar në rëndësinë dhe vlerat që ka ky muaj i madh, z. Aga apeloi që në këto ditë të mbetura gjithsecili t’i drejtohet Zotit me pendim e falje, duke pasur si synim final fisnikërimin dhe lartësimin e vet moral e shpirtëror.
Mes të tjerash, z. Aga u shpreh se kjo tryezë është tregues i marrëdhënieve të ngushta e vëllazërore që ne si besimtarë kemi mes njëri-tjetrit. “Ne jemi të pandarë dhe kështu do të mbetemi gjithmonë”, deklaroi z. Aga.
Në fund, z. Aga iu lut Zotit për më tepër mirësi e begati për myslimanët dhe për ditë më të lumtura për shqiptarët dhe familjet e tyre.
Tryezat e iftarit organizuar nga KMSH për besimtarët dhe grupe të tjera shoqërore do të vazhdojnë edhe në ditët e mbetura të Ramazanit.
