Komuniteti Mysliman ka organizuar qysh nga fillimi i Ramazanit iftare të përditshme për besimtarë të shumtë në kuadër të muajit të bujarisë dhe solidaritetit shoqëror.
Në tryezat që janë shtruar në ambientet e Medresesë së Tiranës kanë përfituar besimtarët e xhamive Et’hem Bej, ajo e Medresesë dhe e Tabakëve, ndërsa pjesëtarët e xhamive do të jenë të ftuar në ditët në vijim. Të ftuar gjithashtu kanë qenë dhe tarikatet e ndryshme të vendit tonë.
Në këto organizime shoqërore, që kanë njohur një pjesëmarrje të gjerë, besimtarët kanë pasur rastin të urojnë dhe përgëzojnë njëri-tjetrin për begatinë e madhe të këtij muaji të rëndësishëm, si dhe të ndiejnë nga afër kujdesin dhe vlerësimin e institucionit që i përfaqëson.
Krahas kryetarit H. Selim Muça në to kanë marrë pjesë edhe drejtues të lartë të Komunitetit Mysliman të Shqipërisë.
Komuniteti Mysliman ka në plan organizime të tjera të kësaj natyre, të cilat i konsideron si mundësi reale për forcimin dhe shtimin e ndjenjave vëllazërore mes myslimanëve dhe si rast unik për të afruar e njohur njerëzit me të vërtetat dhe udhëzimet e fesë së pastër islame.
