Të nderuar vëllezër dhe motra besimtarë,
bashkëqytetarë dhe shqiptarë që jetoni kudo në botë!
Duke ju përshëndetur së pari me paqen dhe mëshirën që vjen prej Allahut Fuqiplotë e Falës, ju uroj me përzemërsi gëzuar Muajin e Madhërueshëm të Ramazanit.
Uroj për besimtarët dhe gjithë shqiptarët ardhjen e muajit të begatë, muajit që është e porta e mirësive për të dy jetët, muajit ku sofra e çdo myslimani është e hapur për zemrat e lënduara nga varfëria e pamundësia.
Ju uroj gëzuar ardhjen e muajit të ringjalljes së shpresave, të bashkimit të zemrave, të përkushtimit ndaj Zotit Mëshirues për një të nesërme më të mirë për Shqipërinë, shqiptarët dhe njerëzimin.
Jemi në prag të muajit të bujarisë, të diturisë, të vëllazërisë e të harmonisë, si besimtarë dhe si qytetarë të këtij vendi të mrekullueshëm që Krijuesi na e ka caktuar dhe lënë amanet.
Ky është muaji ku Allahu Mëshirëplotë i dhuroi njerëzimit fuqinë e dijes përmes librit të Tij hyjnor, Kur’anit Famëlartë, për të dalluar të drejtën nga e padrejta dhe për të qenë një shoqëri që vazhdimisht është në kërkim të vlerave fisnike, një shoqëri ku individi më i vlerësuar, më i afërt te Krijuesi është ai që sjell më shumë dobi për shoqërinë, sikurse na e përcjell mëshira e botëve, Profeti Muhamed (a.s.).
Së fundmi, i lutem të Madhit Zot që ky muaj, ky mysafir kaq i shtrenjtë dhe i veçantë të sjellë në familjen e çdo besimtari, çdo shqiptari më shumë dashamirësi, dhembshuri për te zemrat që vuajnë, më shumë zemërbardhësi e bujari për çdo krijesë, më shumë vëllazëri për të shtuar mirësitë dhe penguar veset, më shumë përkushtim e sakrificë në ndihmë të njëri-tjetrit dhe më shumë kurajo e shpresë se Zoti nuk na ka harruar, se Shqipëria dhe shqiptarët do të kenë një të ardhme ndryshe nga e djeshmja.
Agjërim të lehtë e të pranuar tek Allahu Pranues.
Zoti e begatoftë dhe e ndihmoftë Shqipërinë dhe shqiptarët.
