Kryetarja e Kuvendit, duke i uruar mirëseardhjen të ftuarve, vlerësoi Muajin e Ramazanit si një muaj të jashtëzakonshëm për të gjithë besimtarët myslimanë, në Shqipëri, Kosovë, Maqedoni, Mal të Zi dhe në mbarë botën.
Në fjalën përshëndetëse drejtuar të ftuarve, Kryetarja e Kuvendit u shpreh se:
"Ky është një muaj, ku si asnjëherë tjetër, të gjithë ne ndiejmë, sesa e madhe është forca, sesa e madhe është fuqia që besimi të jep, për të qëndruar përpara dhimbjes, për të besuar në ditë më të mira, për t'u udhëhequr nga besimi dhe morali më i mirë. Janë momente, ku të gjithë ne përjetojmë dhe kuptojmë se jemi të barabartë me diferencat tona.
Në një muaj të tillë si ky muaj më shumë se kurrë, ne e kuptojmë sesa e rëndësishme është dhembshuria, sa e rëndësishme është të kuptojmë tjetrin kur s’ka, sa e rëndësishme është të kuptojmë tjetrin kur është në vuajtje dhe të ndash me të aq sa mundesh, në familje dhe në shtëpitë e gjithsecilit.
S’ka sadisfaksion më të madh, s’ka gjë më të bukur, se të ndihmosh tjetrin, kur është në nevojë.
Sinqerisht ju falenderoj për ardhjen tuaj këtu dhe ju uroj gëzuar këtë festë dhe ditë mbara për të gjithë ju, për të gjithë shqiptarët, për kombin tonë”, - tha ndër të tjera znj. Topalli.
Ndërsa kryetari i KMSH-së ka falënderuar znj. Topalli për iftarin e shtruar, gjë që e ka bërë traditë të përvitshme, si dhe e ka mbyllur iftarin me një dua, për mirësitë e dhuruara nga Zoti i Madhëridhëm për besimtarët dhe mbarë njerëzimin.
